వయసు పెరిగే కొద్దీ ముఖంలో సహజ కళ తగ్గిపోతుంది. ముఖంపై ముడతలు వచ్చేస్తాయి. చర్మం సాగిపోవడం, పిగ్మెంటేషన్ సమస్యలు ఎదురవుతాయి. యాంటీ ఏజింగ్ పండ్లు, కూరగాయలు మిమ్మల్ని మళ్ళీ యవ్వనంగా కనిపించేలా చేస్తాయి. మీరు ఎంత వయసు పెరిగినా, నవయవ్వనంగా కనిపిస్తారు..

దానిమ్మలో యాంటీ ఆక్సిడెంట్లు పుష్కలంగా ఉంటాయి. ఇవి శరీరాన్ని ఫ్రీ రాడికల్స్ వల్ల కలిగే నష్టం నుండి రక్షిస్తాయి. దానిమ్మలో లభించే పునికాలాజిన్ చర్మంలో కొల్లాజెన్ ఏర్పడటానికి తోడ్పడుతుంది. ఇది ముఖాన్ని ప్రకాశవంతం చేస్తుంది. ముడతలను తగ్గిస్తుంది.

అవకాడో మోనో అన్‌శాచురేటెడ్ కొవ్వు, ఒమేగా-3 కొవ్వు ఆమ్లాలు, విటమిన్ ఇ వంటి పోషకాలకు అద్భుతమైన మూలం. దీన్ని తీసుకోవడం ద్వారా చర్మం హైడ్రేటెడ్‌గా ఉంటుంది. ఫ్రీ రాడికల్స్ ప్రమాదం కూడా తగ్గుతుంది.

నారింజ, నిమ్మకాయలలో విటమిన్ సి పుష్కలంగా ఉంటుంది. కొల్లాజెన్ ఉత్పత్తిలో విటమిన్ సి ముఖ్యమైన పాత్ర పోషిస్తుంది. ఇవి చర్మాన్ని యవ్వనంగా ఉంచడంలో చాలా సహాయపడుతాయి.

బ్లూబెర్రీలలో ఆంథోసైనిన్స్ అనే మూలకాలు సమృద్ధిగా ఉంటుంది. బ్లూబెర్రీస్ విటమిన్ ఎ, సి, ఇలను కలిగి ఉంటాయి. ఇవి చర్మానికి అవసరమైన పోషకాలను అందిస్తాయి. ఈ విటమిన్లు కాలుష్యం, UV కిరణాల నుండి చర్మానికి పూర్తి రక్షణను ఇస్తాయి. బ్లూబెర్రీస్‌లో ఉండే యాంటీఆక్సిడెంట్లు చర్మంపై వృద్ధాప్య ప్రభావాలను నెమ్మదిస్తాయి. చర్మం యవ్వనాన్ని కాపాడుకోవడానికి సహాయపడుతాయి.

టమోటాలలో లైకోపీన్ అనే యాంటీఆక్సిడెంట్ ఉంటుంది. ఇది సూర్య కిరణాల వల్ల కలిగే నష్టం నుండి చర్మాన్ని రక్షిస్తుంది. ఇది చర్మ కణాలను కూడా ఆరోగ్యంగా ఉంచుతుంది.

నట్స్‌, డ్రైఫ్రూట్స్‌లో విటమిన్ E, ఒమేగా-3 కొవ్వు ఆమ్లాలు, యాంటీఆక్సిడెంట్లు అధికంగా ఉంటాయి. ఇవి చర్మ ఆరోగ్యానికి చాలా ప్రయోజనకరంగా ఉంటాయి. చర్మాన్ని యవ్వనంగా ఉంచుతాయి. ఈ ఆహారాలన్నీ మీ చర్మాన్ని బిగుతుగా మార్చి యవ్వనపు మెరుపును తిరిగి పొందడానికి సహాయ పడతాయి.