దక్షిణ కొరియా దిగ్గజం LG  సరికొత్త బడ్జెట్ స్మార్ట్‌ఫోన్లను అందుబాటులోకి తీసుకురానుంది. W11, W31, W31 ప్లస్ స్మార్ట్‌ ఫోన్లను త్వరలో విడుదల చేయనుంది. గత ఏడాది లాంచ్ చేసిన W10, W30 సిరీస్‌లకు కొనసాగింపుగా ఇప్పుడు W11, W31 మోడళ్లను ఆ సంస్థ ప్రకటించింది. W31ప్లస్ స్మార్ట్‌ఫోన్‌ చూడటానికి W31 మాదిరిగానే ఉంటుంది. కానీ దీని స్టోరేజీ 128GB వరకు ఉంటుంది. ఈ మూడు కొత్త స్మార్ట్‌ఫోన్‌లు ఒకే స్క్రీన్ సైజు, ప్రాసెసర్, బ్యాటరీ సామర్థ్యంతో మార్కెట్లోకి రానున్నాయి.

మోడల్‌ను బట్టి ధరలు
 W11 స్మార్ట్‌ఫోన్‌ 3 జిబి ర్యామ్, 32 జిబి స్టోరేజ్ వేరియంట్‌తో లభించనుంది. దీని ధర రూ .9,490. W31 మోడల్‌ 4 జిబి ర్యామ్ + 64 జిబి స్టోరేజ్ ఆప్షన్తో లభిస్తుంది. దీని ధర రూ.10,990. W31 ప్లస్‌ 4 జీబీ ర్యామ్ వేరియంట్‌ రూ.11,990కు లభించనుంది. ఈ మూడు ఫోన్లూ 6.52 అంగుళాల డిస్‌ప్లే,  HD+ రిజల్యూషన్‌, వాటర్‌డ్రాప్ నాచ్‌తో అందుబాటులోకి రానున్నాయి. వీటికి 8 మెగాపిక్సెల్ సెల్ఫీ కెమెరా ఉంటుంది. W11 స్మార్ట్‌ఫోన్‌ 3GB RAM, మీడియాటెక్ హెలియో చిప్‌సెట్తో లభించనుంది. W31, W31 ప్లస్‌ మోడళ్లలో 4GB RAM ఉంటుంది. ఈ స్మార్ట్‌ఫోన్‌లు ఆండ్రాయిడ్ 10 అవుట్ ఆఫ్‌ ద బాక్స్ ఆపరేటింగ్ సిస్టమ్‌తో పనిచేయనున్నాయి. స్టోరేజ్‌ను పెంచుకోవడానికి మైక్రో SD కార్డ్ స్లాట్‌ ఆప్షన్‌ కూడా ఉంటుంది.

కెమెరా సామర్థ్యం
 LG W11 డ్యుయల్ రియర్ కెమెరా సెటప్‌తో లభిస్తుంది. దీంట్లో 13 మెగాపిక్సెల్ ప్రైమరీ, 2 మెగాపిక్సెల్ సెకండరీ కెమెరా ఉన్నాయి. W31, W31 ప్లస్‌ ఫోన్లలో మూడు రియర్ కెమెరాలు ఉంటాయి. వీటిల్లో 13 మెగాపిక్సెల్ ప్రైమరీ కెమెరా, 5 మెగాపిక్సెల్ అల్ట్రా-వైడ్ యాంగిల్ లెన్స్, 2-మెగాపిక్సెల్ షూటర్ కెమెరాలు ఉన్నాయి. మూడు స్మార్ట్‌ఫోన్‌లు హెడ్‌ఫోన్ జాక్‌తో లభిస్తాయి. W31, W31 ప్లస్ స్మార్ట్‌ఫోన్లకు ఫింగర్ ప్రింట్ సెన్సార్‌ ఫీచర్‌ కూడా ఉంటుంది.