36 ఏళ్ల రఫీతో 21 ఏళ్ల గీతాంజలి ప్రేమ.. మధ్యలో మరో మహిళ.. స్టేషన్ లో యుద్ధం

మాకు ప్రాణహాని ఉంది,మా ప్రాణాలను కాపాడండి అంటూ ఓ ప్రేమ జంట పోలీసులు ఆశ్రయించింది. ఈనెల 24న ఆంధ్రప్రదేశ్ స్టేట్ వక్ఫ్ బోర్డ్ ఆధ్వర్యంలోని గుంటూరు జిల్లా సంగడిగుంట హాజీ వద్ద వివాహం చేసుకున్నామని వారు చెబుతున్నారు. ఈ ప్రేమ జంట 24వ తేదీ గుంటూరు జిల్లా కలెక్టర్ ను ఆశ్రయించగా గుంటూరు, బాపట్ల జిల్లా ఎస్పీలతో మాట్లాడారని, కలెక్టర్ సూచన మేరకు బాపట్ల జిల్లా ఎస్పీ తుషార్ డూడిని కలిసి రక్షణ కల్పించమని కోరేందుకు వారు బాపట్ల చేరుకున్న సమయంలో, డీజీపీ పర్యటన కారణంగా ఎస్పీని కలవలేకపోయామని తెలిపారు. జిల్లా పోలీసు కార్యాలయం అధికారుల సూచన మేరకు మార్టూరు సర్కిల్ ఇన్స్పెక్టర్ ను కలిసామని రఫీ, గీతాంజలి చెబుతున్నారు. 24వ తేదీ నుండి అజ్ఞాతంలో ఉన్నామని, గ్రామంలో రఫీ కుటుంబ సభ్యులను చంపుతామంటూ బెదిరింపులకు పాల్పడుతున్నారని, రఫీ కుటుంబ సభ్యులకు ప్రాణహాని ఉందంటూ ప్రేమ జంట ఆరోపిస్తోంది. ఇరు కుటుంబాలకు చెందిన వ్యక్తులు బాపట్ల పట్టణ పోలీసు స్టేషన్ వద్దకు తరలివస్తున్న పరిస్థితులలో, ఉదయం నుండి బాపట్ల పట్టణ పోలీస్ స్టేషన్ లో ఉన్న ప్రేమ జంటను సాయంత్రం నాలుగు గంటలకు బాపట్ల డిఎస్పి కార్యాలయానికి పోలీసులు తరలించారు. బాపట్ల జిల్లా మార్టూరు మండలం ద్రోణాదుల గ్రామానికి చెందిన షేక్ మహమ్మద్ రఫీ (36) ఆర్ఎంపి పని చేస్తున్నాడు. అదే గ్రామానికి చెందిన తిరుమల శెట్టి గీతాంజలి(21) గుంటూరు జిల్లా బోయపాలెం మిట్టపల్లి ఇంజనీరింగ్ కళాశాలలో బీటెక్ ద్వితీయ సంవత్సరం అభ్యసిస్తోంది. 

రఫీ గీతాంజలి ప్రేమ పంచాయతీ తో తల పట్టుకున్న పోలీసులకు మరో తలనొప్పి వచ్చి పడింది. రఫీ, తాను గత పది సంవత్సరాలుగా సహజీవనం చేస్తున్నామంటూ అదే గ్రామానికి చెందిన మరో మహిళ ముందుకు వచ్చింది. తాను ఎంబీఏ పూర్తి చేసి గుంటూరులో ఒక ప్రైవేట్ హాస్పిటల్‌లో చిన్న ఉద్యోగం చేస్తూ గౌరవప్రదంగా జీవిస్తున్నానని, రఫీ కారణంగా తన భర్తను వదిలేసి ఇద్దరు పిల్లలతో గుంటూరులో ఉంటున్నానని, రఫీని ఎట్టి పరిస్థితుల్లోనూ వదులుకునేది లేదని అవసరమైతే చీటింగ్ కేసు పెడతానంటూ చెబుతోంది. ఇద్దరు మహిళలు ఒకే వ్యక్తి కోసం చేస్తున్న ప్రేమ యుద్ధం ఏ తీరానికి చేరుతుందో కాలమే నిర్ణయించాలి.