లివర్ ను ఆరోగ్యంగా ఉంచే 10 ఆహారాలు..

ఫ్యాటీ లివర్ అనేది లివర్ లో కొవ్వు పేరుకుపోయే పరిస్థితి. శరీరానికి సరైన ఆహారం లేకపోవడం, శారీరక కార్యకలాపాలు తక్కువగా ఉండడం, ఊబకాయం దీనికి ప్రధాన కారణం. ఫ్యాటీ లివర్ ను అలాగే వదిలేస్తే అది లివర్ వాపు, సిర్రోసిస్, లేదా లివర్ వైఫల్యం వంటి తీవ్రమైన ఆరోగ్య సమస్యలకు దారి తీస్తుంది. సరైన ఆహారపు మార్పులతో ఈ వ్యాధిని నియంత్రించవచ్చు. కొంత శ్రమతో, ఆరోగ్యకరమైన ఆహారపు అలవాట్ల ద్వారా ఫ్యాటీ లివర్ సమస్యను తగ్గించుకోవచ్చు.

ఆకుకూరలు: పాలకూర, లెట్యూస్, కాలే వంటి ఆకుకూరలలో యాంటీఆక్సిడెంట్లు, ఫైబర్‌ ఉంటాయి. ఇవి కాలేయంలో కొవ్వు పేరుకుపోవడాన్ని తగ్గించడంలో తోడ్పడతాయి. వీటిలో నైట్రేట్, పాలీఫెనాల్స్ లభిస్తాయి. ఇవి లివర్ నిర్విషీకరణలో కీలక వహిస్తాయి. ఈ ఆకుకూరలు రోజువారీ ఆహారంలో భాగం చేస్తే లివర్ కొవ్వును నియంత్రించుకోవచ్చు.

చేపలు: ఒమేగా-3 కొవ్వులు అధికంగా ఉండే చేపలు లివర్ ఆరోగ్యానికి చాలా మంచివి. వీటిలోని ఒమేగా-3 వాపును తగ్గించి లివర్ లో కొవ్వు పేరుకుపోవడాన్ని నియంత్రిస్తుంది. ట్రైగ్లిజరైడ్ స్థాయిలను తగ్గించడంలోనూ ఇవి ముఖ్యపాత్ర పోషిస్తాయి.

డ్రై ఫ్రూట్స్: బాదం, వాల్‌నట్‌ లలో ఆరోగ్యకరమైన కొవ్వులు, యాంటీఆక్సిడెంట్లు, విటమిన్ E పుష్కలంగా కలిగి ఉంటాయి. ఈ డ్రై ఫ్రూట్స్ లివర్ మీద ఒత్తిడిని తగ్గించి దానిని శక్తివంతంగా పనిచేయడానికి తోడ్పడతాయి. డ్రై ఫ్రూట్స్ తీసుకోవడం వల్ల శరీరంలో ఉన్న ఇన్ఫ్లమేషన్ తగ్గిపోతుంది.

కాఫీ: కాఫీ తీసుకోవడం వల్ల లివర్ ఎంజైమ్‌లు, వాపు సమస్యలు తగ్గిపోతాయి. కాఫీ లివర్ మీద శుభప్రభావం చూపుతుందని పలు పరిశోధనలు వెల్లడించాయి. కాఫీని పరిమిత మోతాదులో తీసుకుంటే లివర్ ఫైబ్రోసిస్‌ను తగ్గించుకోవచ్చు.

ఆలివ్ ఆయిల్: ఆలివ్ నూనెలో ఉన్న మోనో అన్‌శాచురేటెడ్ కొవ్వులు, యాంటీఆక్సిడెంట్లు లివర్ మీద మంచి ప్రభావం చూపిస్తాయి. లివర్ శక్తివంతంగా పనిచేస్తుంది. వాపు సమస్యలు కూడా తగ్గుతాయి.

వెల్లుల్లి: వెల్లుల్లి లివర్ లో శక్తివంతమైన నిర్విషీకరణ లక్షణాలను కలిగి ఉంటుంది. ఇవి శరీరంలో ఉండే వాపు సమస్యలను తగ్గించి లివర్ ను ఆరోగ్యంగా ఉంచుతాయి. వెల్లుల్లి శక్తివంతమైన శోథ నిరోధక లక్షణాలు లివర్ లో కొవ్వు పేరుకుపోవడాన్ని తగ్గించడంలో తోడ్పడతాయి.

బెర్రీలు: బ్లూబెర్రీలు, స్ట్రాబెర్రీలు వంటి బెర్రీలలో యాంటీఆక్సిడెంట్లు, పాలీఫెనాల్స్‌ సమృద్ధిగా ఉంటాయి. ఇవి లివర్ కణాలను దెబ్బతినకుండా కాపాడుతాయి. బెర్రీలను తరచుగా తీసుకోవడం వల్ల లివర్ ఆరోగ్యంగా ఉంటుంది.

పసుపు: పసుపులో ఉండే కర్కుమిన్ అనేది యాంటీ ఇన్ఫ్లమేటరీ లక్షణాలను కలిగి ఉంటుంది. ఇది లివర్ లో కొవ్వు పేరుకుపోవడాన్ని తగ్గించడంలో సహాయపడుతుంది. పసుపు వాడకం లివర్ పనితీరును మెరుగుపరచడంలో కీలక పాత్ర వహిస్తుంది.

గ్రీన్ టీ: కాటెచిన్స్ అనే యాంటీఆక్సిడెంట్లు గ్రీన్ టీలో పుష్కలంగా ఉంటాయి. ఇవి లివర్ లో కొవ్వు పెరుగుదలను తగ్గించేందుకు దోహదం చేస్తాయి. పలు అధ్యయనాలు గ్రీన్ టీని క్రమం తప్పకుండా తీసుకుంటే లివర్ ఆరోగ్యానికి మేలు చేస్తుందని చెబుతున్నాయి.

తృణధాన్యాలు: వీటిలో ఫైబర్, ఖనిజాలు, విటమిన్లు అధికంగా ఉంటాయి. తృణధాన్యాలు రక్తంలో చక్కెర స్థాయిలను నియంత్రించడంలో సహాయపడతాయి.